“واشمِعنى انا”
بقلم: صلاح سالم عروة
كل الشفايف تبتسم فوق الوشوش
والضحكة حلوة بتترسم من غير رتوش
كل الخلايق حاسة ليه طعم الهنا
إلا أنا
واشمِعنى انا
الدمعة حابسة نفسها بين الرموش
والفرح يهرب من فؤادي مايعرفوش
والاقي كل الناس ماتعرفش الضنا
إلا أنا
واشمِعنى انا
أمشي ومعايا وحدتي فِ سِكّة سُكات
يقتل سكونها دمعتي وصوت النايات
أحزن على عمر انقضى
ولّا ابكي على حظي اللي مات؟؟
واكتب قصايد عن حياتي المؤلمة
واشمِعنى انا
أصرخ بصوتي فِ الفضا فين الطريق؟؟
يردّ حزني يقول تعالَ أنا الصديق
ده انتَ حبيبي ودنيتي وانتَ الرفيق
وأنا اللي فاضل لك هِنا
واشمِعنى انا
أمشي فِ طريقي وسِكّتي مافيهاش رجوع
واركب سفينة غربتي من غير قلوع
تاهت وضاعت دمعتي فْ بحر الدموع
يارب إمتى دنيتي تِقيد لي الشموع
يمكن بنورها أحس يوم طعم الهَنا
وأعيش حياتي بالأماني والمُنى
ولاقولشِ يوم إلا أنا واشمعنى انا
