جرَّب تضحك
بقلم: مها شاهين
هو يعني لو هتضحك شيء هينقص باقي عمرك
عادي والله يعني اضحك حتى ضحكة خالية جمرك
لو لقتهم مرة شاوروا قالوا بصوا امسك سعيد
اخفى حالا عن عيونهم حتى ضللهم بعيد
قولهم انا شفت ضحكة بس جريت من هناك
روحوا حاولوا تلحقوها ولما يبعدوا عن مداك
كرر الضحكة الجميلة وارمي تكشيرتك وراك
خليك سعيد يا حزين دول عشقانين دمعك
انزف دموع الويل واصرخ ومين سمعك
عاملين ما بينكم حيط ما يهده غير ضحكتك
اضحك بقى يا عبيط في البسمة دي قوتك
مش ياما يابني بكيت وجعك طرد بسمتك
وساعتها جيت ونعيت وكتبت من حرقتك
ولما البسمة زارتني قابلها الدمع كان أسرع
واربت الباب عشان تدخل فقال الحزن لا ترجع
بتنسى ليه الضحكة وفاكر أوي الأوجاع
خدت كتير مافرحت باكي عاللي ضاع
وتهمل اللي معاك وتعشق المتساب
وتقلب الأوضاع قال خدت بالأسباب
مين قالك استسلم وإن العذاب قدرك
ماتعيش وتتعلم تلقى الكريم جبرك
عالبسمة كون قادر مش صعب تتبسم
الضحك شيء نادر لكنه بيعلم
وإن كت هتبدأ زيف أهي بكره تتحقق
الحلم مش تخريف لو بس يتصدق
بس انت اروي الشفايف ببسمه صغيرة
هتطرح تبقى شايف الضحكة منورة
تتبدل المرارة بحتة سكرة.
جرب تضحك
