أمر فصل بقلم وحيد علي الجمال جذر مد و مد جذر هي قسمه بعد جمع والّلا قسمه بعد طرح؟! والَّلا هو جرح باقي مش مساوي لأي فرح! المعادلة لسه محتاجه لشرح!! مش رياضة أو محاسبة كل شيء بيساوي شيء والنتيجة عامله أزمة زاويه قايمة لمَّا مالت وقَّعِت كل المَمَالك مد ايدك خدلي حق هو يعني كله زق؟!! الشقوق مليانه بَق! والغراب واخد قراره اوعى مرة تقولي لاء هو بعد الشق شق؟! مد جذر وجذر مد كنت عامل فصل حد بس بعد الحد سد لِسه عِشقك أيوه جد لسّه راسمك جوه صدري صورة منحوته بوشم اوعَى تغرز في العشَم اُوعَى تفتح جرح لَم حتى لو كنت ابن عم كل واحد خد له جنب والوتر مشدود ما بينّا معترفشي بأي ذنب الخلاف د جرح قلب والمعاندة أب شرعي لكل حرب!! الّلي بينا مش هزيمة والِّلي فات مش بردو نصر الرحيل مش باختياري القرار كان أمر قصر كان أمر فصل والنتيجة في احتلالي.. ألف صفر مد ايدك جوّه جوّه قلبي كان عايش فِتوّة بس كان لسه مِعشش جوّه روحه بردو كسر! كَان يغني انت حر كان بيسمح إني امُر كَان له ماضي بس حاضر استحاله كان يناقش أي أمر. الجناح اللي انت شايفُه لِسّه فارده جوّه أسر والغياب اللي انت كاتبُه في الوصية لسه عاصر قلبي عصر! زاوية حادة فوق كتافي كاشفه ضهري لِلطوفان خوفي مِنك بات يعلِّي في الحيطان الحقيقة أن طرح الخوف جبان!!
