أدبي

قصيدة “فَرَّقِي الورق اللي فاضل”

وقت النشر : 2022/02/14 09:58:54 AM

قصيدة “فَرَّقِي الورق اللي فاضل”

بالعاميّة المصرية

بقلم/ وحيد علي الجمال

فرّقي الورق اللي فاضل

اختاري منه بصرتك

والعبي يالا بفريقك

وارمي عنادي ف سكتك

مايغركيش صبري عليكي

شايف نهايتي واضحة فيكي

وانتِ الأخيرة ف سكتي

ماتلجّميش الحرف فيكي

ومتكسريش بقى فرحتي

ليه لما اقول فيكي الحقيقة

بتسكتي وتتمتمي

دا نصيبي أصله وقسمتي

ارميني خارج دايرتِك

واكتبي حُكمِك قوام

 قبل امّا ألمح كدبتِك

واحلفي إن الخيال اللي اتحكى

دا يبقي فصل في قصتي

الكل جم يتفرجوا وينظّروا

ويكبّروا في دايرتك

وكتير في دايرة حضرتِك هيصدّقوا

وكمان كتير في دايرتي

أصل انتي في التأليف بتبقي مبهرة

وحبكة الأحداث بتبقى مؤثرة

حقيقي فعلا كنتي هايلة انا بحسدك

وأنا كنت من إعجابي بيكي

 هكَدِّب العمر اللي عشته

واعيش مصدّق كدبتِك

فرّقي الورق اللي فاضل

وارمي ويّا البصرة حاضر

غرقان في بحر من المشاكل

ممنوع يجيب لجرحه ساتر

أو يشتكي

 يضحك وجوّة بلوِتُه

مجبور يكمل سِكِّتُه

ممنوع يقَلِب في الدفاتر

ارمي ويّا البصرة ماضي

وقلب من جوة انكسر

 ارمي شايب عاش ف قلبه

ميت ولد

كان بيضحك

وضهره م العشق انجلد

واختاريني بعد سيف

حظي منك زي ضيف

سمع الحكاية وانصرف

أصل سيفي كان ورق

معرِفش يتحدى الطوفان

جدّفت فيه جوة الديوان

حتي الديوان بتاع زمان

خلّص قصيدتي وانسرق

عِدّي البنات جوة الورق

وارمي جنب البنت كومي

واغمزيلي قبل ما أقش الورق

غمضت عيني شوفتها

سحبت وعودي عندها

حرقت كروتي كلها

خلصت دوري؟

عِدّي الورق

زر الذهاب إلى الأعلى