أدبي

عَدينا يا مصر

وقت النشر : 2022/10/15 11:06:42 AM

عَدينا يا مصر

بقلم: محمد عبد العزيز رمضان

عَدينا يا مصر
في إيدنا سلاح
ورجعنا بنصر
هزمنا الخوف
مش ممكن يوم
هينام مرتاح
هيعيش بالعار
في جحور وكهوف
وقدرنا نداوي
يا بلدي جراح
نرسم بدمانا
أمل مخطوف
هنعيش من تاني
نعيد أفراح
واللي يقرب
فالموت موصوف

عدينا يا مصر
وقولنا كمان
اللي يقرب
هيلاقي الموت
بعزيمة وقوة
ورضا وإيمان
كبّرنا يا مصر
رفعنا الصوت
واللي يقربلك
مش هيبان
بسنانا هناكله
ومش هيفوت
محفوظة يا مصر
وفي القرآن
مذكورة كتير
وتاريخ مثبوت

عدينا يا مصر
سبقنا الليل
والصبح طلع
من بعد ضلام
إوعاك ترجع
هتدوق الويل
لحدودنا هنحمي
ومش هنّام
هنضحي بروحنا
وروحنا قليل
أنا مهما هقول
مش لاقي كلام
غير حبك أنا
مش لاقي بديل
أنا مهما ابعد
ببعتله سلام

عدينا يا مصر
عبرنا حدود
خلينا الخوف
يبعد لبعيد
حققنا الوعد
بقينا أسود
من بعد الحزن
اهو جانا العيد
ومحينا الشر
مهوش موجود
من تاني الخير
يكبر ويزيد
وجناين فل
معاها ورود
أمجاد وتاريخ
نحييه ونعيد
نفتح لك كل
طريق مسدود
والكل يعيش
فرحان وسعيد

عدينا يا مصر بقلم: محمد عبد العزيز رمضان
عدينا يا مصر
بقلم: محمد عبد العزيز رمضان

شاهد أيضاً
إغلاق
زر الذهاب إلى الأعلى