خارج نطاق الخدمة
بقلم: وحيد علي الجمال
وانا هكتب لمين غيرك
ومين غيرك هيسكنّي
بحور الشعر والقافية
بأوزانه وأبياته وتفعيلته
على غيابك بتتكسر
أنا غيّرت أحكامه كدا عافية
وتمشي حروفي في سطوره
على قد الوجع تبكي وتتكفى
هألّف بحر في عينيكي
يكون مخصوص بقى ليكي
وهكتبلك قصيدة تكون
كفيفة الحِسّ مش شايفة
بترفض كدب أبياتي
ولو مش قادر
انشرها ولا احكيها
على الناصية
بتبقى حالتي كدا حالة
واشوف أخباري في النشرة
واقوم مغلوب بكام بصرة
ورغم ان الورق مكشوف
وكان عشمي بقى أكسب
قلَب إيده في آخر الدور
حاولت اهرب وملعبشي
لقيت نفسي مانيش موزون
وبتطوح على الجنبين
كأني للألم موصوف
غريب ماشي مع الزفة
واهز دماغي واتخفى
كما الدرويش
بلف في دايرة مقفولة
واعيد في اللفة 100 لفة
تاخدني الرعشة والدوخة
واطير مأسور ومتكلبش
مع دموعي
سحبت كروت على حظي
لقيت الحكم بالرأفة
وآخر صف مش مضمون
وقفت وماسك الدفة
وبارسم فوق على بابك
علامة نصها استفهام
وسوء ظنك مهوش عاوز
ينوب عنّك ولا يعدي
بلا استئذان
يخيَّل لك من الخضة
بإنى شيطان
ما تشغلشي بقى نفسك وتفكيرك
ماهي الدنيا ومن غيرك
بقت أحلى من امبارح
وريحها خفيف
ولا مرة خطرت ف مرة
على بالى
ولا جرحك هيبقى رهيب
وهكذب كل يوم واحلف
تملّي باللي كان بينا
حقيقي بجد صدقني
مافيش مرة بتوحشني
ولا مرة أخدت
مساحة م التفكير
بقلم: وحيد علي الجمال
