إنتَ المطلوب
بقلم: وحيد علي الجمال
من بنك الروح
أنا هصرفلك
آخر إحساس
وهجبلك عمري
يشهد لك
ويكون ضامن
ويكون سدّاد
مش لازم تكتب
في حسابك
و لا أي شروط
راح اسيبلك
روحي مع قلبي
من غير باركود
إسحب في مشاعري
وأحاسيسي
كدا ع المكشوف
أنا عمر الحب
اللي ساكنّي
لا هيمرض
أبداً في بعادك
ولا حتى يموت
هي الحكايات
اللي مابينّا
محتاجة ريموت؟!
باتقلب فيها
وبشتاقلك
ولا حد هيقدر يمنعني
لو حد حدود
أنا شايفك دايماً جوايا
الدنيا بحالها ومافيها
والسكر دايب
في خدودك
دايما مظبوط
وسؤالي عليك
مش محتاج له
ولا أي جواب
مهما المسافات
تبعد بينّا
الهوى غلاب
الشوق انا زارعه
ف بساتينك
بيزيد فدان
وبخافك تسمع تنهيدتي
ويكون لها صوت
لا يصيبك بس
اللي صايبني
والفرحة في عينك
م الخضة
تزعل و تموت
وبحبك أيوة
يا واحشني
يا ابو قلب طروب
العالم جنبك
ولا حاجة
إنت المطلوب
بقلم: وحيد علي الجمال
