عفويات بقلم: عادل عوف أنا عارف إيه هي عيوبي راسي ناشفة ومن أصل جنوني وما فيش في دولابي ولا جيوبي وبتخانق مع دبان وشي وإن خدت قرار ببقى مصمم يتنفذ وبـأى طريقة مش بعرف اماين واستسلم وان شالله تقوم ألف حريقة فـ إن قولت بلاش وما لوش لازمة يبقى أنتِ بلاش تعملي أزمة وبعند الند تناكفيني يكفيني سكوتك والطاعة أنا بصفا يادوب في خلال ساعة مخنوقة وفعلًا متضايقة فـ بلاش تاخديني الشماعة وبقولك اهو من أولها ومن غير تلفيق أنا وأنتِ هنمشي وقدامنا فيه ألف طريق لو واسع عايزك فيه جنبي كتفي بكتفك وفي ضهري تكوني سند ليه أول ما تضيق واضمن لك حبي وإخلاصى ومش أي كلام وهشيلك على عيني وراسي لسنين قدام وهبادلك حب بحب أكبر زي الأفلام وحياتنا تكون كتالوج دايم لأجمل أحلام على شرط تكون الملاغية ودلعنا وطقم الحنينة زي الأسرار الحربية والفيلم الخام
