الشاعر: د. أسامه أبوضيف
وليه بس نزعل وليه الٱهات
وليه بس نبكي على حد فات
وليه الملامة وليه العتاب
وليه طب نفكر في الذكريات
وليه احنا نعشم ف
ناس يوم باعتنا
يناموا ويصحوا
يجيبوا ف سيرتنا
انسى اللي هانت عليه الليالي
وشافك حزين لكن لم يبالي
إياك انت لحظة تراهن عليه
وبكرة هيعرف خسر قد ايه
لما يجيلك يبوس الادين
وانت بترفض تسلم عليه
الشاعر: وائل البطراوي
خلوا الرضا شئ عادة
خلوا الفرح بزيادة
حياتنا ما ليها إعادة
ف ليه نزعل ونتكدر
شدوا الهمة بإرادة
حطوا ع الحزن سدادة
دى همومنا لينا صيادة
ف ليه نتعب ونتوتر
تكشيرتنا مفيش منها إفادة
دى البسمة حسنة و عبادة
فى وشوش الخلق شهادة
وجبال من الحب ما تتقدر
لو همومنا كتيرة ولادة
لو حياتنا تشبه السادة
ركعتين على ضهر سجادة
تنور دنيتنا وتتخضر
الشاعر: أحمد بهاء الدين
نزعل ونقول اه والف اه
ماهو علي قد الاه يتوصف دواه
في ناس دواها طب
وناس دواها نظرة
وانا جرحي أهل الطب هجروه
وأهل العشق خانوه
هايم سكران بكلماته
وأشرب خمور الذكرى
كاس في صحة الضحكة
وكاس في صحة الفرقة
وبقيت الضاحك الباكي
لاضحكه فارق ولا بكاه
