جندي صعيدي

جندي صعيدي

بقلم: شحاتة علي أبودرب

صعيدي وعرضه ف أرضه

والدم لأجل العرض يهون

شاف أنجاس هتمس الأرض

شد سلاحه على الصهيون

دا تراب مصر وروحنا فداه

واللي يفرط فيه ملعون

سبع وشارب من صدر أمه

جينات العزة تفوق مليون

جندي صعيدي عينه قوية

صخر ف وش رياح الكون

نظرة عينه أقوى رصاصة

قبضة إيده مدفع هون

جسمه سلاح فتاك ودمار

قلبه حديد بالنار معجون

حط حياته ف قبضة إيده

باعها بشبر تراب مركون

حامي عرينه حافظ حده

وصية جده اوعى تخون

شاف أعداءه مدوا رجولهم

فاكرين إنه وديع وحنون

خاف تتنجس أطهر أرض

فتح النار تقول مجنون

واحد هو وهما كتير

هز سلاحه يا رب العون

ساوى أعداءه بوش الأرض

سفّوا ترابها كما الأفيون

وهو يعيشها عظيم الشان حد

زي ما كان من عهد آمون

أو يتخلد جنب الشهدا

جوا الجنة مكان مضمون