حبيبتي يا زاوية رزين .. يا بلد الطيبين

حبيبتي يا زاوية رزين
يا بلد الطيبين

بقلم: أمل محمد أبو خطوة

بيتنا القديم طوبه ني بناه أبويا دورين

إحساس بإنك حي فى زمان الطيبين
وكنون بيطهي الأكل والمحشي بالدخان
والسكر بالقرطاس والشاي من الدكان
وأنا فاكرة أيام زمان
الناس الطيبين
وقماش على التموين
ومخازن أبويا فيها الزيت للفرد م البراميل
وشوال السكر خيش
فرط مش متعبي ف كياس
وقلوب الناس زمان
طيبة وقلوب صافين
وشجر التوت للكل
تحت التوتة قاعدين
ونخل البلح العالي
يتفرق ذي التين
وعيال قاعدة بتلعب
تحت البلحة والتين
أخوات بضماير صافية
من بكرة مش خايفين
طالما بينا محبة ومرؤة بني آدمين
هنام الليل بسكينة
ونقوم بقلوبنا الصافية للناس ومحبين
حملين نقاء ريفنا عمرنا منكون خاينين
وكنون الست جارتنا أمي بتطلسه بالطين
وبناكل ويا أولاد حتتنا غدوة في ليل رمضان
ونقوم للعيد بلعبنا نعيد على الجيران
وصلاة العيد تجمعنا ومحدش فينا جعان
لأننا اتربينا وسط الناس الجدعان
وأبويا كان بيقولي
نادي عمك فلان
وفلان كان جارنا تَمَلِّي
يجي من الغيط شقيان
وقلبه دايمًا تعبان
وأبويا كان جنبه وأمي لمراته تعين
والبحر كان صافي نشرب من الزير
ونغسل المواعين
دا زمان كان فيه الناس الطيبين
وقلوب صافية وطاهرين
ومحبة مخلصين
بالفطرة للدين فاهمين
كانوا دايمًا راضين
وفي يوم الأزمة كله بيكون جنب المنكوبين
ولو اشتعلت حريقة
نخرج كلنا جارين
بكل أواني بيوتنا نجري واحنا شايلين
ونطفي حريقة جارنا
وننام بقلوب مطمئنة دايمًا بنصينا راضين
قلوب صافية بنقاء الخيرين
راضين رب العالمين
دي بلدي حبيبتي الغالية
وأيام الخير والرحمة
فيكي يا زاوية رزين