حيطان الضرب
بقلم: وحيد علي الجمال
بيبان الناحية بتحاوط
مساحة كبيرة زي ميدان
وبتضفر شوارع دربنا المقفول
لباب واحد ماينفعشي
يكون مفتوح
وكنا كلنا شلة بنتجمع
على جامع أبو البركات
وكله في سهرة صباحي
بنلعب فيها كُلاتنا السبع بلاطات
ونجري كتير كتيير مسافات
إذا لحقنا نقول كهرب مانتحركش
لحد ماييجي ويحررنا
امير اللعبة والمسافات
في دايرة قلبها بيرجف
نبُص لبعضنا بالدور
نألف قصة والتانية
نمَوِّت نفسنا م الرعب
وكان أبو رجل مسلوخة
على ضهره شوال مقطوع
تملي يعدي في خيالنا
يلون وشّنا بالخوف
وكان بيعبي في شواله
ضحايا كتير
وكان دايما مطيع وأمين
بيعرف كل اللي نعرفهم
أبويا وأمي واخواتي
الكبار طبعا
وبيحقق أوامرهم
بيستُدعَىٰ إذا مرة
رفَضْت النوم
ولو فكرت تتزمزق تكمل أكل
ولو رأيك بقى مخالف زعيم البيت
ولازم تصحى في ميعادك
وتاكل أي شيء كارهُه
ولو حتى مهوش مهضوم
سنين مرت وربّونا على المكروه
نقول حاضر وجيل كامل
بقى مغصوب
نطوف في بلاد مانعرفهاش
وتسرح جوة أحلامنا
قلوب خضرا
ماتعرفشي كفوف الموت
ولو فضيت بنملاها بزرع الشوق
فانوس سحري في أفلامنا
يشَبَّعنا يشجعنا نطير ونعدي
حدود الكون
وكان يحكمها في الغالب
أبونا الغول
مابينّا وبينه حدوتة
بطلها من زمن تاني
بلاد مرسومة جوه السور
متستغربش لو شوفت القمر مبلول
ورغم الليل اللي كان ساكن حوارينا
بعتمة توبها متفصل في قلب النور
مايفرقناش غريب رافض محبتنا
ولو كان الوجع ساكن
على بيوتنا كدا بالدور
هيجي اليوم نقول لأااا
هنرفض تاني نتهجىٰ حروف الخوف
ولو لسة اللي بيعلم في أولادنا
أبونا الغول
بقلم: وحيد علي الجمال
