أنا مسامح
بقلم: عبد الله رجب أبو عدنان
أنا مسامح خلاص يا دنيا
مبقتش ألوم مرة تانية
ولا أعتب على اللي ظلموني
بفكر فـ بكرة
يمكن أكون فـ الفكرة
واللي هان عليهم العشرة
وبعنيهم جرحوني
أنا مسامح وراجع لدنيتي
أحضن الأيام وأزرع محبتي
ولكل اللي خان وباع
بعيدة سكتي
أنا وأحزاني يا ريت تسيبوني
نسيت أوجاع الماضي
وكل شيء خلاص عادي
بحب الناس وعمري ما كنت أناني
ليه ليه بعتوني
د أنا يا ما اتحملت قسوة
بغني وحزينة الغنوة
ضاع كل اللي بنيناه
وراح على سهوة
وفـ لحظة هدمتوني
أنا مُسامح وفاتح إيديا
خلاص نسيت ظلمكوا ليا
لكن الجرح اللي بيا
كل الأطبا ما داووني
يا دنيا أعمل إيه تاني
كُتر الهم بكاني
بعد ما كنت الضحية
خلاص بقيت أنا الجاني
وعلى غلطة ما غلطهاش
دلوقت بيحاسبوني
أنَا مسامح وحبي أمارة
ببكي وعيوني سهارة
رغم الوجع والألم
من القلوب الغدارة
وبالرخيص يا دنيا باعوني
أنا مسامِح.
