حافظ ومش فاهم

حافظ ومش فاهم

بقلم: أمل أمين 

أنا حاسس صحيح تايه

ومش عارف طريقي إزاي

وبحاول أكيد أفهم

وبتعلم لكن نساي

يمين السكة أنا واخدها

وأحيانا تلف شمال

تقولي الدنيا بعاندها

وتقلب وشها في الحال

وأطنش بس مش أهبل

لا أبيع ولا حد يخسرني

وياما أبكي وأبان عيِّل

ومين على عيبي يقبلني؟

وبسمع من الملايكة كلام

ألاقي الجني يلحقني

يقولي يا عم، ده اسمه كلام

كده ع الأرض ضاع حقي؟!

وأنا حافظ ومش فاهم

وكل الكون بقا تاعبني

لا لاقي شبيه ولا تناغم

وأي حوار معذبني

وبرجع أصلي وأستغفر

ف غنوه تهزني وأرقص

أبان مجنون وبستهتر

ضميري يشيط أوي ويقرص

يا ربي، إيه طريق الصح؟

بقيت محتار ومتشتت

خلاص شطبت صبر أهو بح

ومش طايق ومتعفرت

وليه أحكي وهشكي لمين

قدري يا دنيا ونصيبي

هدف واحد وله طريقين

حياتي وغاوية تعذيبي

وآهي أيام وهتعدي

تشد ساعات وبتهدِي

بترفعني لدور عالي

وترزعني على الأرضي

وعادي

سمايا هياها

ونفس الأرض

دي ..أرضي