أدبي

نُص نُص

وقت النشر : 2022/11/02 05:47:54 PM

نُص نُص

بقلم: وحيد علي الجمال

عين تبصّ وعين ترِفّ
وعين تكحّلها بزفت
دنيا ليها ألف وش
لما أنصاف القوالب
فجأة مالت
هزت الجدران وقالت
إنها أفضل كتير
من قوالب كان وجودها
تملّي سالب
والبقاء أصبح غريزة للي غالب
واللي فارد في المخالب
والقوالب مالها عازة
هي عايشة بس تحلم بالمفازة
بين حيطان البيت بتشرب
نَشْع في إزازة اللذاذة
جوة دايرة المتاهة
سارحة عايمة في المزازة
اعرف إن البيت بحالُه
يبقى آيل للسقوط.. للهبوط
واللي كان خايف علينا
هو أول حد فينا
نفسه يرحل من سكات
الدفا مبقاش بيسكن في الحيطان
لسه برد الغربة ناخر في الجدور
لسة كاسر في السطور
الوجع له ألف سور
م المفاجأة دماغي فارت
كنت ماسك حبل غيظي
نادوا قالوا ابن موت
كان معاه البنكنوت
لما سافر قالوا ماتت
كنت راهن نفسي بيها
ويّا مجموعة تذاكر
عدّى قطر العمر خدها
من ساعتها لسه واقف
نص قلب وكام قصيدة
كنت حاضن كام كتاب
جرح مش عاوز يلم
كلمة دافية.. حبل صوف
لَوِّني كل الحروف
حرف ماسِك لسة سيف
حرف ساكن جوة خوف
دنيا ليها ألف وش
عين تبُصّ وعين ترِفّ
وعين تكحّلها بزفت
وألف عين كارهة الظروف
ألف عين رافضة تشوف

نُص نُصبقلم: وحيد علي الجمال
نُص نُص
بقلم: وحيد علي الجمال

شاهد أيضاً
إغلاق
زر الذهاب إلى الأعلى