شوية ملل
الكاتب: وحيد علي الجمال
تعرف تتحول تبقى روحين
و تقسم قلبك يبقى اثنين
تعرف تتقلب على جنبك
وفي جنب جنابك جانبين
وتلف في ثانيه على خدودك
وتفور وتدور في عيونك ذاتك
وترف ترفرف بجناحك
وتعدي جروح جرحت روحك
تطلع فوق سطحك وسطوحك
فتعيط بدل المرة اثنين
وتخش بمللك أحلامك
تفتح وتقلب في كتابك
وكأنك خايف تتحاسب
لا يقولوا عليك فعلا
هايف
وكفيف القلب ماهش
شايف
لو كان له بدل العين ملايين
لو قلبك جالك متأريف
وبمللك جالك متكتف
على شط مراكبك بيأدف
وتحس كانك بقى مجبر
لازم في حروبك تستسلم
النكسه هتحكي عليك مجرم وتعيش مهزوم
وتموت مهزوم
والسر هيفضل فيك
مكتوم
لوحد هيقرا
في قصيدتك
هيقولوا مجنون
ودماغه اكيد
راحت منه
لو حرروا محضر
لجنانك
اتحول سمكة بزعنوفه
ع ترعة سرس المحروسه
هتلاقي كباري مرصومة
وقهاوي لفجرك منصوبة
اطلب خمسينه مع شيشة
واتوصي كمان بالتحبيشه
اسحب في حجيرك واتسلطن
هتلاقي حجارة
تجيب فدادين
وحجارة تحدف
بها كلبين
أخلاقنا تشبه
مراحيضنا
مابقاش عندنا
واعظ ولادين
اكتب على مللك
بقى هيس
اتلحف بيه
اوعى تميل
ضمه في احضانك
روح آيل
مين بس هيعتب
على عيل
