الحكاية باختصار إن المشهد السياسي والأمني بين واشنطن وطهران وصل لمرحلة حرجة جداً. وبقت كل الاحتمالات مفتوحة. تصريحات الرئيس الأمريكي دونالد ترامب عن "هدوء لمدة أسبوع" مخدعتش حد. لأن الكل فاهم إنها مجرد استراحة محارب وإن الخيار العسكري لسه موجود على الطاولة في أي لحظة. على الجانب التاني، إيران متمسكة بموقفها إن أمن المنطقة لازم يفضل في إيد دولها. رافضة أي تدخلات خارجية، خصوصاً بعد ما بريطانيا وفرنسا بدأوا فعلياً في حشد قطع بحرية وفرقاطات وكاسحات ألغام في مضيق هرمز . تحت مسمى "حماية الملاحة الدولية". التحركات دي خلت المضيق نفسه بؤرة احتكاك مباشرة وممكن ينفجر في أي توقيت. إضافة لكل ده، الملف النووي لسه معقد جداً، مع إصرار الوكالة الدولية للطاقة الذرية على تفتيش المنشآت الحساسة. وهو مطلب إيران بترفضه، وده بيفتح الباب لعقوبات اقتصادية جديدة أو حتى صدام مسلح مباشر. المشهد كله متشابك، ما بين ضغوط نووية، وحشود بحرية. وتهديدات عسكرية، وكل ده بيخلي المنطقة كلها على صفيح ساخن. إيه رأيكم، هل التحركات الغربية دي هتقدر تفرض واقع جديد في مضيق هرمز، ولا إيران هتقدر تفرض شروطها وتمنع التواجد ده؟
