الحياة ياما فيها وفيها_خواطر بالعامية_دعاء الراجحي

الحياة ياما فيها وفيها

خواطر بالعامية

بقلم: دعاء الراجحي

الحياة ياما فيها وفيها
فيها كل حاجة تتخيلها
وفيها خبايا وعيون متدارية
فيها ناس حاجات جواها مستخبية
وشوش بتضحك من غير سعادة
ووشوش بتتمنى للحظة إعادة
ناس بتحب الحياة بقلب صافي
وناس كل حلو بيحصل بتداري
قلوب تحبك وقلوب تغير منك
قلوب تتمنالك الفرح
وقلوب جرحتك أكبر جرح
الحياة يا مافيها وفيها
ألغاز وحاجات ما فهمناش معانيها
بص عالقلوب هتشوف ألوان
يا بياض صافي ونقاء وقلب كله خير
يا سواد وكره وقلب عمره ما بيتمنى الخير للغير
بص ياسيدى وبصي يا ستى
لا تتعشم في حد ولا تنسى الجميل لحد
امسك فاللي يحبك واديله كل حبك
وانسى اللي باعك وما اتمناش يوم ودك
لا تتعب نفسك فى علاقة
ولا تحاول تفهم حاجة باينة من البداية النهاية

الحياة ياما فيها وفيها
ياما مشيت في شوارعها وضواحيها
هيمان سرحان
شايل هم حزن كان موجود زمان
م انت فـ الآخر إنسان
مش مطالب تضغط زرار النسيان
الحياة ياما فيها وفيها
ياما سمعنا حكاوي من ناس
نص كلامهم يا كدب يا من غير قيمة
الحياة ياما فيها وفيها
إوعى تتغير عشان حد اتغير عليك
قليل الأصل إذا باع
فهو أصلًا بياع
إنما إنت أصيل وبتحفظ الجميل
الحياة ياما فيها وفيها
ناس حلوة بقعدتها وحكاويها
وطلتها وبسمتها بالدنيا وما فيها
الحياة ياما فيها وفيها
بسمة وفرحة ونسمة هوا
دمعة وكسرة وزوبعة
يوم كدة ويوم كدة
بس أنا متأكدة
إن ولا حاجة بتدوم
لا حزن بيدوم ولا فرح بيدوم
كل لحظة ليها زهوتها
وكل قسوة أهي أزمة
وبكرة يبقى ما لهاش لزمة
حتى نفتكرها
الحياة ياما فيها وفيها
حبيت بس أحكيها
بطريقة مختلفة
يمكن نشوف حاجة ما شوفتها بعنينا
الحياة ياما فيها وفيها
إوعى بس تزهق وكمل
عشان الطريق طويل
ومحتاج نفس طويل
وحد شايف الدنيا
صح لا بيدي لحاجات ولا
لأشخاص
قيمة أكبر من قيمتهم
وبرضو لازم تقدر اللي حطينك
أول اهتمامتهم
الدنيا ياما فيها وفيها
وياما هتشوف وتسمع عن الناس واللي فيها

الحياة ياما فيها وفيها
أغاني ألحان حزن وأشجان
عيشها زي ما هي وانسى القَسيَّة
وعجبي!!