رد القدر
بقلم: إيمان عمار
إوعاك يا خايب
تحوج أمك للبشر
تحتاج لحاجة
رايح في نومك نص يومك
غلبان يا عيني من السهر
إوعى
لا نهرك من قساوتك يوم يجف
ترجع تدَّور ع المطر
إوعاك تغرك دنيتك
عدى النهاردة بس بكره بيفتكر
إوعى
من رد القدر
إوعى
تتعكز على الناس والحيطان
وإنت مشغول عنَّها
أو تعوزك ما تلاقيكش جنبها
إوعى
لحظة تقف قصادها نِد ليها وللزمن
مهما تكبر إنت لسَّاك ابنها
أو تجادلها وتتعِب قلبها
إوعى
تنسى عمرها!
إوعى
تنسى ميعاد دواها
وتفتكرلك ماتش كورة
أو مسلسل قبلها
ولاَّ تخرج يوم بطولة
فايتها قاعده وحدها
إوعى
إحساسك يقولك:
ما لي بس وسجنها
إوعى
تحرمها في يوم من حقها
إوعى تلغي رأيها
وحسِّسها دايما قد إيه محتاجلها
وبرضه مسؤول عنها
لو حكاية قالتها مرة وكررت
إوعى
تزهق أو تقلل شأنها
أو يبان عليك إنك سمعتها قبلها
دي إللي ربِّت، كبَّرِت ياما خدت وقتها
إوعى
ترفع يوم إيديها وتشتكيك للي خلقك
أو دموعها تهون عليك وتكون بسببك
إوعاك يا واد! قلبك ده زاد
لو طَّل منه سواد
احميه برقوة تِنُّورُه
تغسل سوادُه بياض
إياك تطول العتمة جدران الفؤاد
إوعى
تاخدك الدنيا بطولها وعرضها
تصحى مـ الغفله تفوق تندهلها
ما تلاقيش يا ولداه ردها!
يا شقاك، يا غُلبك
يا إللي ما كانلك خير في أمك
كان صعب يعني تنول رضاها وهي جنبك
راحت بدعوتها إللي كانت ساندة ضهرك
مش باقي غير مُر الحياة من بعدها
الله يعين ويقدَّرك، وسداد ديون مش قدَّها
يمكن في أهون حال تهدَّك، تكسرك
