نفس الطريق
بقلم: أمل أمين
رغم إننا
نبان بعاد عن بعضنا
وعمره ما جمعنا مكان
ولا زماني هواه زمانه
ولا أواني نفس الأوان
لكني أقرب منه ليه
حِتة مني وكأني فيه
نفس البنود، نفس الحدود
وهو هواه الوطن
حتى الملامح
منقوشة بالآه والشجن
ونفس الطريق بنمر بيه
بس ولا يوم اتقابلنا
بالتوازي بنمشي فيه
بالورود بنهادي بعض
تشوفنا ماشيين فيه سوا
بس الأرض غير الأرض
أرضه صلبة
قاسية وواعرة
وأرضي أنا
طينتها سهلة
خيرها باقي
زي ما في القلب نبض
أرضه عاقلة
كل شيء بحساب وحكمة
وأرضي أنا
تقول محدش فيها باقي
مسامحة وراضية بأي كلمة
هو كده، حالنا كده
لو هو ميّة
بكون هوا
لو كان ضنا
هكون دوا
يبقى ما يبقى، زي بعضه
المهم، أكون معاه
والأهم، نكون سوا
