أدبي

بحبك

وقت النشر : 2022/06/15 11:54:28 AM

بحبك

بقلم: أمل أمين

 

 

بَحبِك

زي نسمة صيف معدِّية

في عز الحر

وأحبكْ

زي إيد حانية

وبتطبطب وبتداوي

في لحظة قهر

وأَحِبك

زي ما تكوني

كده مني

كأنك مالية شرايينك

شوية دم من دمي

ساعات تِقسي

وأحس معاكي بطفولتي

وتقلبي وش

تبقي أمي

يا نبضه وتايهة

من قلبي

وونسي في وحدتي وغلبي

يا روح الروح

وويايا منين ما بروح

ولو صوتك عِلي شويه

أنِّخ وأبوح

يا صُحبة خير

لا تعرف حقد

ولا تطمع

في حاجة الغير

يا عزة نفس وأبية

وطيبة أصل وقوية

لكن مليانه حنية

هقولك إيه

وأعيدلك إيه؟!

حبيبتي ما أنت حافظاني

وعجناني وخبزاني

وطول الوقت أنا معاكِ

ملازمك وأنتِ لزماني

دعيت الله في يوم الحشر

تناديني وأناديكِ

ونتقابل بعفوه هناك

وما يلزمني من الدنيا

غير حبك وحبِك بس

كفاية لما بحتاجك

أبص ألاقيكِ

 

 

ذات صلة

 

 

أمل أمين
أمل أمين

 

 

شاهد أيضاً
إغلاق
زر الذهاب إلى الأعلى