اتعلم تجرح
بقلم: أمل أمين
عايز تجرح حد في قيمته!
بيعه بقسوة واكسر نفسه
وهينه في كرامته
عارف إزاي؟!
سهلة بسيطة
مش شغلانة
يعني حويطة
سيبه يكتبلك ألف رسالة
إوعى ترد
كبّر واتعالى
ولما يرن .. سيبه يرن
لا تشتاق له
ولا حتى تحِن
خليه يعاقب نفسه كتير
وميلقاش أبدا تفسير
ويبكي بحُرقة
وهتصعب على نفسه الفُرقة
فجأه هيمسح كل رسايله
ويندم على خيبته وعمايله
وإنه في يوم فتح لك بابه
وكان لك صاحب
وكنت لقلبه أعز أحبابه
واليوم غايب
لما تفوق .. راح تعرف قيمته
وتجري تدور
وهتسأل عنه وعن سيرته
بس ساعتها هيكون فارق
وهتنقح على نفسه كرامته
وقتها لازم تغلب طيبته
وعمره ما ينسى في لحظة إهانته
فانسى طريقه
أو عن بُعد بص وراقبه
وشوف إيه حكايته
بعد ما كنت أعز ما ليه
وسِبته بغدرك ويّا ظنونك
يبيعوا الناس ويشتروا فيه
شوفوا دلوقت
اتحدى الدنيا بكل عزيمته
علشان تندم بس عليه
فإوعى تدور
ولا تفكر تسال عنه
مش هيجاوبك ولا هيرد
أصله ده دين ولازم يترد
خلى ديونك بقا تتسد
إللي يبيع القلب الطيب
عمره ما يتبكي لحظة عليه
بس كفاية بجد في حقك
إنك للقسوة علمته
