مسك الختام

مِسك الختام

بقلم: أمل أمين

تصدق بإيه؟!

مهما أقول

وأوصف مشاعري

وحالتي في غيابك

وتوهتي ويّا قهري

وقلقي عليك

وفكري شارد

فيك وحيرتي

ولا دمعة معلقة

على طرف جفني

ولا خطفة روحي مني

لما طيفك هلّ عندي

ونزلت الدمعة

بتصرخ بأعلى صوتها

ياااااا واحشني!

صدقني حبك مش كلام

ولا حلم عدا وراح لحاله

وبقا أوهام

حبك إنت بصمة باقية

في قلب قلبي

ووشم مختوم جوه روحي

واتكتب اسمك عليه

وجنب منه مِسك الختام

صورة بالألوان

ممكن ترسمني؟!!

بس تكتّر جوه الصورة من الألوان

إوعاك تنسى وحزن عينيا وضعفي يبان

أو تجاعيد تحتيها تظهر

إوعى بجد!!

ده يبقى لا معنى ولا منظر

لأ غطيها

خلي طفولتي تظهر فيها

أنا من حقي أفرح بيها

ما هي خدعتني

راحت وفاتتني

قبل ما أشبع منها وفيها

داري كمان خصلاتي البيضا

عايزاها تلمع لون الشمس

وأنسى نهاري

وأرجع تاني ليوم الأمس

عدا بسرعة وملحقتوش

فاتني كتير ومشوفتوش

أما شفايفي

ارسم ضحكة بلون الدم

تطغي بجبروتها

على ألمي وكل الهم

ممكن أسأل:

ينفع برضه تلون قلبي؟

ليه شايفاه زعلان بهتان؟

حقه كمان في الصورة يبان

أصله بقاله سنين تعبان

يمكن يفرح

عمره ما جرب يقسى ويجرح

عدا العمر وعاشه مظلوم

وحقه يا عيني كان مهضوم

عانى كتير

من خذلانه وم الحرمان

لطش عادي وميهمكش

حتى ملامحي

لو هتضيع أو مش هتبان

عادي وماله

اسمها صورة وبالألوان