البيت يا بويا معدش هو
بقلم: رباب سمير غانم
وحشني صوته ولمته
وسط البيت مع ضحكته
عالصبح كانت سبحته
بين إيديه على طاولته
جلابيته البيضة مع طلته
يزيدوا كمان من بهجته
البيت يا بويا معدش كان
زي ما كنا أيام زمان
الضحكة كانت مالية المكان
و أمي مالية البيت حنان
و أخويا الصغير أهو جه كمان
قاعد بيسرد حواديت زمان
كنت دايما بتحكهلنا
عالسرير قبل ما نام
البيت يا بويا ما عادش هو
ناقصه ضحكة من القلب جوه
ناقصه إيد على الكتف تربت
تشيل معاها هم الزمان
أمي أهي بعطفها
ضمانا دايما جنبها
شيلانا جوا قلبها
واخده بإيدينا لبر الأمان
البيت يا بويا شايل معاه
ذكريات أيام كتيرة
مش يكفي نسرد فيها ليلة
محتاجة دهر علشان نحكيها
البيت يا بويا هو هو
لكن البرودة مالية المكان
