“حِشَرِي”
بقلم: جمال زكي عينر
حشري
حِشَرِي وحاشِر مناخيرك؟
في كل صغيَّرة وكبيرة
بتخش ليه في شئون غيرك؟
ولا بد يكونلك تأشيرة
كان حد سألك رأيك إيه؟
أو حد محتاج خِبرَاتك؟
من غير مؤاخذة يا عم البيه
إحنا ف غِنَى عن خدماتك
خليك في نفسك أكرَم لَك
بلاش تِنزِّل مِن حالك
إحفظ كرامتك أسلم لك
وعدِّل انت ف أحوالك
دايماً عامللي أبو العرِّيف
وواد مِفتَّح وحَلنجِي
لطيف أوي وبدم خفيف
ومثقف الواد كلامنجي
لو تلتزم بس حدودك
وتعرف انك مش مقبول
الناس ماهِيش طايقة وجودك
مش سامعة ليك مهماً هتقول
ليه تبقى كده مكشوف الوِش؟
وان حد صدَّك ما بتفرِقش
لزقة ورِزِل وبايِع دمَّك
بالظبط زي الدُود في المِش
لزقة ورِزِل وبايع دمَّك
بالظبط زي الدُود في المِش
