ومش عظَمَة

ومش عظَمَة

بقلم: جمال زكي عينر

ومش عظَمَة اقول إني
جمال الخبرة من سِنِّي
أنا مرّيت بناس ياما
ولِيَّا أمارة وعلامة
وطُفت الدنيا وطويتها
ولي بصمة ف بلاد ياما

أنا اللي كنت بتمنَّى
ألاقي الدنيا يوم جنَّة
وكنت الباني والموان
وبفرش أرضها حِنّة

عافرت كتير مع الحيتان
مع اللي جي ع الغلبان
وكنت بقَسِّم اللقمة
على المسكين و ع الشقيان

أنا مرِّت عليَّا سنين
قاسيت فيها ضنا وأنين
تبات الدمعة في عينيَّا
لكن أصبح قرير العين

وكنت انا بالهموم راضي
وكنت الخصم والقاضي
على نفسي وأحوالها
ومش بغضب على الفاضي

وبعد ما مر بيّا العُمر
وبعد الحلو ويَّا المُر
عملت مصالحة مع نفسي
وبيها فخور ومش مُغتَّر

أنا بسِنِّي بقيت خبرة
بقيت الحِكمة والعِبرة
وبرسم فوق سنين عمري
خطوط لولادي ولبُِكرة

وبرسم فوق سنين عُمري
خطوط لولادي ولبُكرة