“سلم آداب”
بقلم: مصطفى جمعة عبد الباسط
بنت مالية الدنيا فرحة
حياتي من غيرها اكتئاب
عن كسوفها لما تمشي
حاضنة بإديها الكتاب
عن براءة بنت حلوة
واقفة على سلم آداب
عن جمالها وهي أصلا
أحلى بنت ف الحجاب
لو هتتنقب كفاية
بس نظرة من النقاب
لو حضرتي عادي هحضر
غبتي هبقى في الغياب
عادي برضو أشد حيلي
لو تسيبي انتساب
هتلاقيني ف كل حتة
جاي بخبّط كل باب
اسمحيلي أبقى منك
أبقى أبو بنتك وابنك
وابقى شمسك وابقى ضلك
وابقى آخر شيء فاضلّك
لو ف يوم الكون يسيبك
اسمحيلي أكون حبيبك
قسمتك قدرك نصيبك
تبقي فيا وضع يد
وابقى فيكي احتلال
طب هقولك حاجة مثلا
ابتسامتك أحلى منك
وانتي أجمل م الجمال
قلبي مدمن نظرة منك
وانتي إدمانك حلال
فيكي من حوّا الأمومة
وفيكي من آسيا الإيمان
فيكي من كلوباترا قوة
فيكِي من إيزيس حنان
نفسي اقولك كلمة تاني
نفسي يبقى حدود مكاني
م الشمال أسلوب حياتك
والجنوب يبقى ابتسامتك
شرقي يبقي دعا ف صلاتك
غربي يبقي ابني بملامحك
واما أوصل باب حدودك
كلمة السر لدخوله
أنا بحبك
