“زعلان حبتين”
بقلم: وحيد علي الجمال
لما كنا في جيش بلدنا
كنا حاضنين البراح
كنت محبوس في المعسكر
بس حاسس بارتياح
مهما كانت المخاطرة
هي عنوان الكفاح
كان ينادي في الرديف
واحنا نضحك باشتياق
لسه فاضل للكحول
بعد منه كام صباح
عد صرفك في الجراية
قبل ماتسلم سلاح
كنا في الخدمة يوماتي
نوصِل الليل بالصباح
أيوة عارف لسه فاكر
لما برد الصحرا يهجم
ع الكتيبة
قبل مايجيلك غُبَارُه
كان بيقلع في النجيلة
والطنين يمسك في ودنك
زي صفارة الحريق
كله نايم في العنابر
وانت واقف في الخلا
يرمي رمله جوه وشك
يبقي شكلك زي ميت
كان في قبره اندفن
فجأة راجع للحياة
كنا أشباح بالممارسة
بس عاشقين الكفاح
قلبي جاهز للمهمة
روحي ارخص حاجه ليكي
هي مهرك للحياة
مصر يا كل الحياة
السقعة ناخرة ف جسمنا
زي الرصاص
والضلمة شايلة زمهرير
دُشمَة صلبة
جوه ضهري وف جِنَابي
تسمع الخبط في سناني
زي واحد لابسُه جِنّي
بس ماسكُه من قفاه
زي لوح التلج واقف
فوق صوابعي
وانت ممنوع م الصياح
كل حتة بين كفوفي نَمِّلت
بس قابضة ع السلاح
الأمر في الآخر تمامُه
انتباااه
وانت مشدود بالثبات
كنت في الخدمة مُرابط
لما احس دماغي مالت
انسند على دفعتي
واصلب في طولي
الوجع ملهوش مكان
والكسل ملهوش مكان
لحظة.. اجمع
لحظة.. شِد
مرة واحدة.. استرح
حد واحد للنهاية
شد أجزاء السلاح
واللي شايل في الذخيرة
يبقي جاهز للكفاح
خلى بالك
احتمال الحرب وارد
خلى إيدك ع الزناد
كنا ناكل أي حاجة
وقت جوعنا
وتبقى أحلى م العسل
كان سلاحنا هو ذاتنا
كان شرفنا
عمري مرة ما يوم فارقته
حتى وقت النوم معاه
لما كنّا في جيش بلدنا
كنا ناكل بالحساب
كنا نمشي ع الصراط
كل شيء بالمسطرة
واما وقت الضحك ييجي
كان بيبقى مسخرة
كنا أطيب م الطيابة
كنا أشرس م الأسود
بعد نوبة الحراسة
نحدف تمامنا ع الطابور
شد نفسك.. المياصة للبنات
مش للذكور
والذكورة يعني راجل
مش نوع لجنس
الرجولة في المواجهة
وانت واقف فوق ترابها
حد يلمس بس شالها
تبقى م الآخر نهايته
أيوة عاشق ليها طبعا
بس زعلان حبتين
فارقة جامد بين عيالها
خيرها رايح بس فين
واحنا ولادها الشقيانين
ولا يعنى لما اقول
إن احنا فيها تعبانين
مظلومين.. ابقى كافر!
أيوة حَابِّك أيوة عاشقك
بس زعلان حبتين
هو ممنوع اني افضفض
واشكي منك جوه مني بكلمتين
ولا ممنوع اني أبكي
لما عيني تبقى شايلة دمعتين
لما الاقي الهجر سُنّة
وانتي جوة القلب فرض
أي عيشة مش معاكي
لو في جنة تبقى كرب
هو معقول بعد حضنك
يوم تساعني أي أرض
