وكإن دموعي الهربانة
من نِنْ عيوني وبتسرَحْ
محتاجة لمَرْسى وغرقانة
وكإن البسمة على شفايفي
أحيانًا بتصَعَّب شرحي
وبتوصل بيا وبطَرْحي
لبساتين ضلمة وهلكانة
مش دايمًا كل حياتنا
هتكون شبه اختيارات القلب
ولا لازم دايمًا معاناتنا
ذنبها إننا كارهين الكدب
أحيانًا دمعة بالألوان
تظهر وقت ما حيرتنا تبان
زهرة عنيدة ودبلانة
ضوِّت أنوارها في البستان
مش قلت خلاص شايف نفسك
ولقيت روحك وسكن قلبك
وألا انت نسيت إنك مسكين؟
والفكرة اللي حاضنها إمبارح
لساها شريدة وحيرانة
كنا فاكرين الدنيا سخيَّة
وإننا بكرة غير دلوقتي
والمعاناة اللي إحنا عايشينها
دي مجرد فترة وشئ وقتي
أحيانًا نسمع حكاياتنا
جوا قصايد وكلام متعاد
ونِحِنْ في أجمل أوقاتنا
لذكرى قديمة في حضن الأجداد
قلناها كتير ده كلام أفلام
دي رواية هزيلة وضعفانة
لكن عمرك فكرت في يوم
إن الفكرة الصعبة الهربانة
تثبت لك يوم إن حياتك
كلها حدوتة في زمن وهم
تثبت لك كل اختياراتك
إن الدنيا حدوتة في فيلم
