عفويات

عفويات

بقلم: عادل عوف

هـتحس بـ إنك دُمــية
من رأسها بحبل معلق
في صالون عربية مسافرة
وصاحبها بطبعه مقلق
فـ تملي يبص و يـسأل
عن عينك ليه بـ تبرق
مع كل مطب بياخده
ويضحك على كدة ويتريق
مع إنك حافــظ ســره
تقدر تفضحه وتضره
حافظ حكاياته الفاكسة
وإزاي من نكسة لنكسة
على طول واقع ومدلدق
وبتعرف امتى بـ يكـدب
وان صادفه في مرة كمين
يقعد يـشتكي أو يـندب
ويجيب 100 واسطة أمين
ويقوله يا بيه و يا باشا
ويشغل له البــشاشـة
ويضحك على نكته البايخة
ويلف شمال ويمين
ويقعد على كدة ويسايره
إنشالله شهور وسنين
فـ إن كنت هتفضل دُمية
دورك بحبال تتمرجح
من حقك ترتاح يوم
تقعد ساكت ومـتنح
وتبطل هز لغيـــرك
وإن قالك كتر خـيرك
تمسك بـ إيديك مناخيـرك
وعلى الطبلون تـتسطح
علشان لو يضحك تاني
على هـزك تقلب جانـي
وتقوله ماكنت مــكانى
مع صول في كمين
و تأبح
دى الناس بتخاف تـتعاير
وتقلق من اللي بيصيح