عفويات

عفويات

بقلم: عادل عوف

أنا بـ ادخل أوضتى ألقانى فيها
قاعد على طرف سريري حزين
فـ اعمل مخضوض مني واقولي
قاعد من إمتى
وتطلع معين
وافرك في عينيه وافنجلها
واتقدم خطوة وأجلها
وحاجات تتعاد واحللها
وع الحال ده بقالي شهور وسنين
غير إنى ساعات بـ القاني ياما
بتكرر حتى بدون تبرير
وكأني بلف في دوامة
أو واخد كذا حقنة تخدير
واشوفني بدون أي مناسبة
موجود مع ناس حلوة ووسمة
بيضحكوا ويرسموا هما الرسمة
وأنا قاعد اقول جملة تحذير
احترس السيارة ترجع إلى الخلف
احترس السيارة ترجع إلى الخلف
احترس السيارة ترجع إلى الخلف
وبترجع فعلًا وبتخبط
النوم تخطيف حتى ملخبط
وآدي واحد منهم بيـستعبط
عمال بيدور بسلامته ويلف
مش كان م الأفضل يجي دغري
أنا عارف إن الصيت مغري
والكلمة حصان عمال بيجري
ومافيش في قاموسه
استنى وقف