عفويات بقلم: عادل عوف بدور عني فيا من فترة وكل يوم وكتير اسأل عليا يقولولى مالوش لزوم وإن مرة بدون ما أخطط أقعد ويايا اربط ويايا يثور ويسخط ويبدأ في الهجوم أنا لسة مش فاهمني ولا فاهم مني حاجة ساعات بكون ظالمنى من غير ما أعملي حاجة آخد على خاطري واغضب واداري مني واهرب گأني فيوز بيكهرب لو يلمس أي حاجة وسطت كتير ما بينا يشفولي معايا صرفة واحد دكتور حبيبنا وواحد عنده حرفة رجعولي بألف حيرة كام مرة والأخيرة قالوا بلاها سيرة واسقينا لمون وقرفة احتارنا معاك و أدينا راجعين من غير حلول كتفت خلاص إيدينا بالعقل و بالأصول سيبك بقي م اللي فات م الصح و م العادات غايات بدوس غايات وانت لساك خجول
