مر من غير أي سكر بقلم عادل عوف

مر من غير أي سكر

بقلم: عادل عوف

الغريب فى الدنيا تايه
لسة بيحلم بالوصول
يوم يعدي ويوم يقاوح
زي ترتيب الفصول
هى دايرة باتساعها
واللي مش مضمون بتاعها
كل يوم تنزل دموعها
ع اللي باقي م الأصول
دنيا فيها كل حاجة
كل ماتتمنى واكتر
فيها بركان م الفجاجة
جنب شريان السذاجة
فيها عمر أنا عيشته سادة
مر من غير أى سكر
الحياة لو يوم تشاغلك
فالحياة دي ما تساويه
مستحيل يصرفها شكلك
وأنت بتحاصرك مشاكلك
لا دا ممكن يوم تسألك
أصلها مابتستحيش
إوعى يوم تتذل ليها
أو فى يوم تعمل حسابها
رحلة وأنت ركبت فيها
عادي تنزل أو تسيبها
هى دامت طب لمين
ولا مين كان يوم كسرها
كلها شوية سنين
والسنين هيبان أثرها
ضهر محنى لعود كسول
عنده رهبة من المثول
لسه عنده من الفضول
يجرى منها ومن ضرارها