الكاتبة: نرمين علي
اضحك على الخيبة والعك
ولما يجي نكد أسكه سك
وأخبي خوفي وكسرتي
وبعند أضحك عندك شك
الكاتب: دكتور أسامة أبوضيف
أشيل الهم وف ثانيه يادوب انساه
و انشر بشاير الفرح و أضحك ب علو الصوت
عودت نفسي ادوس ع الألم وقساه
وف عز حزني أبان للجميع مبسوط
الكاتبة: نرمين علي
قلبي يا شيال الهموم
انسى حزنك جوا الضلوع
اضحك بعلو الصوت يا مكلوم
دا الضحك بشاير فرح مقسوم
الكاتب: عادل الأنور
أشوف الورد؛ وقلبي حزين بِيتْقطّع
أخبّي الحزن؛ أميل ع الورد وأصبّح
ينسيني دلال الورد عيوني اللي بتدمع
يا سحر الورد؛ لمّا في عطوره بَتْفسّح
الكاتبة: نرمين علي
أشوف الورد وقلبي حزين
اشم عطره فقلبي يروق
واضحك من قلبي وأفوق
وانسى كل الحزن يا ذوق
الكاتب: أسامه مسعد
اضحك للدنيا حتى لو عليك مالت
وامشي ف طريقك ما يهمك لو الناس قالت
الحزن سلسال ألم ما يجيب الا الهموم
احضن جواك الامل مهما الدموع سالت
الكاتبة: نرمين علي
اعدل الدنيا المايلة بضحكة
وانسي الهم وكمل في السكة
احجز حزنك جواك واضحك
تلقى الفرحة بحياتك شابكة
