صوت المطر
بقلم: أمل أمين
صوت المطر قاسي وعجيب
كأنه سوط
يضرب الأرض بقوته
عشان تحس أو تلين
صوته عتاب، وكمان عقاب
محاصرها وكأنه كمين
انشق له قلب الحجر
صوت المطر
سامع صراخه بكل حزم
بكل قوة
بينادي ويهدد
ويندد ويتوعد
وإللي عليه الدين
لازم بقا يسدد
حتى المطر بقا ممتعض
مش عاجبه أحوال البشر
ده صوت المطر
فجأة الصراخ هدّا
وع الشباك ميِّل ناحيتي وعدّا
جاي عشاني
أيوه ناداني
وبهمسة من دمعه واساني
وسألني ليه الحزن تاني
وليه بعدتي وإيه سبب السفر
ولصوت المطر
رديت وقُلت
إياك تهدي
بلاش تعدي
وبلاش تنِخ وتكون ضعيف
خليك قوي واضرب بعزمك
علِّم عليهم كلهم
خلي كل الكون نضيف
علمهم كل معنى للأصول
وإيه هو الأدب
حنن قلوبهم من القساوة
طهر نفوسهم من الدناوة
بلاش نفاق وبلاش طمع
كله في كتابنا هيتكتب
واصرخ وقول
مش كل ضحكة ع الوشوش
لازم تموت
ولا كل من منكم ما طالش
لازم يلطش أو يفوت
ولا كل واحد بس صوته إللي هيعلا
والدنيا لازم تخرس، ويعم السكوت
حاول بصوتك تملا كل الكون حياة
إزعق بجد بأعلى صوت
أما أنا
ما بقاش لصوتك عندي صوت
وهتعمل إيه
في قلب أساسه اتكسر
