الإشارة
بقلم: وحيد علي الجمال
كنت واقف في الإشارة
نفسي لحظة تغور وتفتح
مد إيده.. هات سيجارة
كنت فاكر قال بيشحت
راح مترجم لي العبارة
جوه بير الغدر يوسف كان بيضحك
اضحك اضحك
اضحك اضحك اوعي تشرَق
خلى قلبي بسرعة قهقه
ارمي همك عيش وزقطط
مهما كان الحال مضايقك
هو نفسه بكره يصغر
يُسر جايلك بعد عسر
جوة قلبك خش بص
ابني بيت الفرح رُص
هو.. هو لما كان واقف في كتفي
واحنا بنصلي الجنازة
شد ضهري وقال كفاية
اوعي تطمع في الزيادة
خلي حزنك نُص نُص
وبغتاتة في المرايا وشي قالي:
لسة فاضل في الحكاية
خطوة واحدة اطلع وكش
كان بيجري كان بيبكي
اوعى توصل بس بدري
خفت منه روحت عازم بالسيجارة
قام فركها وقالي شكرا
كان باصصلي قالي آسف
اوعى بس تكون بتشتم
كان عاذرني لما قطَّعت الرسالة
فجأة سابني غصب عني
قالي اوعي تخاف وتهرب
بكرة دمعك راح يجف اسمعها مني
