شخص عادي

عايش لوحدك؟

رغم إن الكل جنبك؟!

حتى ممكن حد منك

يبقى ضمك

لا ونايم جوة حضنك

يعني تصرخ جوة نفسك

برة نفسك

وانت ماسك في الوجع

حتى لو قامت قيامتك

حتى لو كانت نهايتك

مستحيل اللي انت ساكن

جوة حضنه هيتوجع

لا انت سامع حد غيرك

حتى غيرك مش سامعلك

هي شافت في الودع

إللي زيك ابن موت

لما شالت م الرواية

فصل كامل كان سكوت

كان بيسأل عن بطل

مهما كان المر علقم

يبقى بعد المُر موت

إوعى يبقى فيه شروط

حتى لو حبيت تعيط

يلّا عيط..

اوعى تزعل لو عياطك

كان له صوت

اجبر المكسور في نفسك

اوعى كسرك يبقى سور

لسه جوة الضلمة طاقة

فيها فجر بألف نور

اوعى أرضك بعد زرعك

جوة زرعك تبقى بور

بين سطورك لسة سطر

لون حروفه بألف شكل

حرف جر وحرف جرح

حرف يكتب ألف فرح

لسه متعلمتش اضحك

وانت قربك كله شوك

المشاعر فيك عليلة

بس قلبي رغم جرحك

لسة ساكن ع الحدود

لو لقيت في السد سد

طير وعدي في المدود

حتى لو مقدرش قلبك

يبقى صفحة بدون جروح

عيش حياتك شخص عادي

جرح عادي..

مش مهم تكون ولي

في القصايد لك مدود