أدبي

من غير عنوان

وقت النشر : 2022/10/31 02:21:21 PM

مِن غير عنوان

بقلم: وحيد علي الجمال

واهي راجعة

بتنشر زعابيبها

وبتفرض تاني

حصارها عليك

بتفتش وتشيل

ف حروفك

يمكن تتكعبل

في قصيدة

من غير عنوان

تمسك لك

طبلة وزُمّيرة

اشمعنى دَاهِيّة

فِي ديوانك

مش واخدة مكان

ف ادراج المكتب

مش باينة

ولا لها عنوان

إوعاك تفتكر

انّ انا نايمة

أو مش عارفاك

وبغمّض عيني

بمزاجي

بس مراقباك

مشاوير ف الغمّ

هنبدأها

جهِّز روحك

أنا هاستناك

أنا شُفتك

ف الحلم امبارح

قاعد وبتضحك

وتهقهق مع

شِلَّةْ بنات

و عامِلِّي الديب

السحراوي

وكأن الخشا

في قلوبهم مات

أنا مالي يا ستّ

بأحلامك

هو انا مسؤول

ما تسُكّي الباب

على أوهامك

خلّينا ننام

عقلي المسكين

راح يتجنن

كان لسة شباب

أنا عاوز عاقل

يسمعني

ويكون كدّاب

هيّ الأحلام المغشوشة

محتاجة ملام

ونبيع ف الحلو

اللي ما بينّا

علشان أوهام

ونفوسنا بغلّها

مش عاوزة

يبقى لها كبير

فاضِل نرشيها

ونحبسها

بطّلي تفكير

من طعم المر

اللي ف حلقي

مش عارف

إن كنت مُحقِّق

ده حقيقي

أو لسة غفير

شاهد أيضاً
إغلاق
زر الذهاب إلى الأعلى