قلب استعمال
بقلم: وحيد علي الجمال
حدِّش محتاج قلب استعمال
مشهود له في صبره بألف نيشان
معموله مقام و كمان تمثال
ملفوف لسة بورق السوليفان
مع إنه صغير أوي يا حرام
شاف غدر وحزن عذاب ألوان
شاف قسوة ومر تهد جبال
والهجر حقيقي مع الخذلان
مش باعرف أكبر في الأهوال
البيع ده بجد ماهوش إعلان
لظروف ممنوع أبدا تتقال
واذا كان السعر ما يتعوضش
والفرصة كبيرة ما تتقدرش
وضمانه معاك دا ملهش حدود
ولا تسمعلوش أبدا ولا صوت
متربي يقول حاضر على طول
أجمل لحظات عمره المسروق
وقت اما يشوفك كدا مبسوط
لو حتّى ف حقه انت المحقوق
لا بيعرف يعتب و لا بيلوم
أبيض من جوة بس كتوم
إن حَبَّك فعلا يتمناك
ما يخافشي الموت لو يبقى فداك
لظروف الهجرة في أي مكان
فيه ناس بتحب بدون طغيان
وفي ناس طغيانها عامل قلَبان
حدِّش محتاج قلب استعمال
وبحالة جديدة ماهيش على بال
طاهر ونضيف ومالهش ذنوب
غير جرح قديم وماهوش معيوب
ودموع مركونة في قلب نتوق
وحلم انا عيشته و كان مسروق
واهو راح
من غير ما يشوف للفرح صباح
دا كيوت حَبّوب شيال أحمال
لو حتى الحمل دا وزنه جبال
الليل بيمر عليه هيمان
ولا لحظة عينيه أبدا بتنام
له قصايد عشق تدوب دوبان
لو تشرب منها تقوم عطشان
لو حس في مرة بحب حبيبه
يفرد جناحاته في بحر الشوق
مش عاوز يسمع أي كلام
ويبات الليل مغرم سكران
حدِّش محتاج قلب استعمال
بقلم: وحيد علي الجمال
