عفويات
بقلم: عادل عوف
بصيت ورايا اشوفني مالقتنيش
والماضي ماضي في الحديث عني
جريت ورايا امسكني مالحقتنيش
مع إنِّي بجري من التعب مِنِّي
انا فاتني إيه من رزقي ولا حاجة
أنا أخدت إيه غير المقسوم لي
سالت روحي لو هيا محتاجة
تهز جسم الوحدة وتقوم لي
هزيت لقيت الجسم كله اتفك
إيدي ورجلي وقلبي في ناحية
والرأس وقع على الأرض قالت تك
مع إنِّي راسى كثيفة اللحية
حاولت اجمع أي شئ لكن
أنا كلي نافر كلي وما صدق
غصبت روحي اتلم من تاني
لكن لقيت أنا دمي متدلدق
أخدت قلبي ورجلي بأيديه
ومشت لراسى أقنعها تتبعني
رفعت لي حاجبي وزغرت لي بعينيه
وقالت لي لازم ولابد تسمعني
أنا اللي شوفته فوق كتافك إيه
غير الوجع وقلبتي وصداع
عايزني تاني و تاني أرجع ليه
ما تحط رجل بدالي ولا صباع
