عفويات “واضح”

عفويات “واضح”

بقلم: عادل عوف

ما بحبش الكلكعة تحت الهدوم بهدوم
ولا أحب ساعة الفرح تحضر معاها هموم
ولا أحب ساعة المرح والضحك حد البكى
فرس العتاب أركبه وف إيدى سيف اللوم

مابحبش السفسطة من غير هدف ولا شرط
ولا أحبشة الطبطبة والإلتفاف والخلط
ولا أحب فرص الصيد وقت انتصار الكيد
ولا أحب روحي وحيد وكأني واقع فرط

ما بحبش المصلحة تبقى مابين أصحاب
ولا أحبش الجدعنة تبقى بميزان وحساب
ولا أحبش المعرفة تبقى لهدف لو تم
نرجع لوحده تغم ويبقى الونس كداب

ما بحبش اللي يقول وكلامه مش شارح
ولا حتى نفس القول لو كان صريح فاضح
ولا أحب كشف العيوب ولا رفع ديل التوب
ولا اللي قوله يادوب وبيختمه بـ “واضح”