عفويات

عفويات

بقلم: عادل عوف

ما بقيتش عارف اعذرك ولا اتهمك
ما بقيتش شايف صدق الحقيقة فين
ألوم صراحتك ولا أنتِ من جهلك
قولتي اللي يخرب في دقيقة بين اتنين

مش لاقي رد ومندهش للآن
دي جرأة منك ومقدرة التبعات
كل اللي بينا في لحظة بينا اتهان
كل اللي بينا من غير أسف قد مات

الذنب ذنبي وماليش أساسًا عذر
وادي نتيجة الثقة الزايدة
منين ما ياجي الأمن ياجي الغدر
والعشرة طلعت منزوعة الفايدة

غويتي قلبي غواية فوق الوصف
والحلو فيكِ معجون بـ سم ونار
افضل معاكي وابقي تحت القصف
يجوز لو اني مدمن خمور وقمار

بيني وبينك لسه بينا حساب
الجاي أكتر م اللي فات ليا
صحيح قفلت ع اللي بينا الباب
وعذابي ليكِ هيبقى تسلية