كان نفسى أكون طيارة
والف العالم وقتي
واحوش وابنى عمارة
واضحك على خيبتي وضيقتي
أو حتى أكون صفارة
في إيدين الحكم إياه
أو متر قماش فى ستارة
موجود فى الغرفة معاه
أو أكون مصباح في إشارة
عطلانة بقالها زمان
واقف تحتها بسجارة
واحد عصبى وزهقان
بيعد الناس لو مَروا
ويلوم ع الصبر ومُره
مكسور القلب وجَره
متعشم في النسيان
كان نفسى أكون بمزاجي
دغرى
وساعات زجزاجى
واضح ومُحدد جدًا
شفاف و گأني زجاجي
والحظ يكون لى الطوبة
اللي في حدفتها خلاصي
دا أنا كل ما اقول التوبة
تطلع بالسنتي مقاسي
وعلشانها ما هيش مكتوبة
بسأل عن حاجة في راسي
بتخم وتظهر فجأة
أول ما بتحصل ذنقة
وتطلع كل مافيا
كلاكيع
وعقد نفسية
فريقين بيتنافسوا عليه
والملعب شرط خماسي
