” كدبة بيضا “
الشاعر: د/ أســـامــــه أبو ضيـــــف
يا حبيبة ازاي حالك
النهاردة عدى ” عام ”
النهاردة عدى عام
عايز أقولك … ولا أقولك
لوش لزوم يامه الكلام
عاملة إيه ف الجنة يامة
عاملة إيه
زينة … تمام
احنا ؟؟؟
إحنا عايشين مرتاحين
مبسوطين
مش ناقصنا أى حاجة
عايشين في غاية لنسجام
اوعي فكرك يوم يقولك
مشتاقين نظرة عنيكي
مشتاقين لمسة اديكي
مشتاقين لو حرف واحد
حتى … من بين شفتيكي
مشتاقين نتلم تاني
كلنا من حاواليكي
كلنا يامة تمام
اوعى يجي يوم تقولي
مشتاقين حنيتك
نعيش دقيقة ف دنيتك
عارفك انا على نيتك
كلنا يامّه تمام
نامي انتي اتهني يامة
وافرحي بالجنة واحنا
كلنا على ما يرام
كلنا فاكرين كلامك
كل كلمة من علامك
لهفتك حبك غرامك
واما كنتي بتكدبي
كدبة بيضا … يا سلام
تضحكي وتستغفري
و دمعتك تنزل قوام
فاكرة كنتي تقولي ايه
( كدبة بيضا مش حرام )
والسلام ع الاهل يامه
الصحبة و البررة الكرام
ياللا
سلام يا اغلى حاجة
السلام يا كل حاجة
السلام مسك الختام
كلنا ” والله أعلم ”
يا حبيبة بخير
سلام
