أأنت صائم

أأنت صائم

كلمات/ حاتم الغيطاني

أنت صايم؟ 

أنت فاهم يعني إيه إن أنت صايم؟

أنت فرحان بالصيام؟

أنت فرحان بالفطار والقيام؟

كل ده حلو وجميل

كل ده مالوش بديل

في الحقيقة وبالدليل

الصيام معناه حقوق

والقرآن معناه حقوق

يلا اصح معايا فوق

أنت أديت فرض ربك؟

هو ده أهم حق

حق ربك اللي خلقك واللي رزقك

لما تسمع.. الله أكبر

أي حاجة تانية.. أصغر

قم وكبر.. قم وشمر

أنت عامل إيه في الحقوق؟

حق أمك ثم أبوك

أنت أمك عنك راضية؟

ولا هي حاجة فاضية؟

لما تفضى تروح تزورها

ده أنت جاحد كل خيرها

أنت عارف فضل أبوك؟

لما كان من الصبح يخرج

يسعى ليك أنت وأخوك

اوعى تنساه في الزحام

وتقولي مشغول بالصيام

أنت عامل إيه في الميراث؟

أنت واكل حق وارث

كلت حقه بأي سكة

بأي حبكة وأي فكرة؟

رجع للوارث فلوسه

وحِبْ فوق رأسه وبوسه

واترك شيطانك ودوسه

أنت عامل إيه في العمل؟

اوعى تظلم حد حقه بين إديك

كنت عامل أو معلم أو طبيب

أو مهندس أو محامي أو خبير

اوعى تظلم حد.. عيب

صن صيامك يا لبيب

اقرأ القرآن في شهره

وكل شهر وكل دهره

افهم معانيه وذاكره

مش كلام تقراه وتفخر

إن كم مرة ختمته

طب عملت بكل كلمة؟

ولا ده كلام للدعاية؟

القرآن معانيه تنفذ

كل حرف وكل آية

في اللسان والمعاملة

وفي الفراق والمقابلة

وفي الطريق والمواصلة

في المصالحة وفي الخصام

هو ده معنى الصيام

هو ده قرآنا وصلاتنا

هو ده عين الفهام

والحقيقة بدون مجاملة

هو ده وزن المعادلة

أنت دينك مش كلام

أنت دينك المعاملة