عارفك محتارة

عارفك محتارة
عارفِك ندمانة

عارفك تستاهلي كل اللوم

ادخلي بروفايلى ف آخر اليوم

فتشي عن نفسك فى كلامي

هتلاقى آلامي

هتلاقي فتافيت أحلامي

فتافيت مكسورة

عمرها ما هترجع مجبورة

ادخلى بروفايلي في آخر اليوم

ركزي ف كلامي وهزاري

واعرفي أخباري

ادخلى للبنت اللي بتعمل لايكات وقلوب

فتشي عندها على أي دليل

على أي ذنوب

خليكي ناسياني

من كتر ما قلبك قاسي علي

أنا شايف انك مش شايفاني

أنا حاسس إنك كارهاني

أو مش عايزاني

انا لما عنيا جت ف عنيك

ملقتش مكاني

ماتت جوايا حاجات حلوة

ما أظنش ابدا ترجع تانى

أنا فى حياتك لسه

أنَا منتهتش

أنا السعادة إلى فى عنيك

أنا وردة دبلت بين اديك

ومفتحتش

بتبيع فى أول لحظة

ليه ما اشترتش ؟

رغم ان قلبي غالي عليَّ

جرحته ألف مرة

وماشتكتش

كتبت فيك سطور كتيرة

عدت عليها عيونك

ووجعني أنها ماتقرتش

أنا جوه قلبك لسه

فاضل خيوط متوصلة

دايرة وروابط

سلسلة

أنا صوتي لسه بيوصلك

أنا مختفتش