قميص مقلوب
بقلم: وحيد علي الجمال
مانيش يوسف ولا يعقوب
ولا هاقدر على غيابك
فأبكيكي واقول مكتوب
ولا حبك هاكفّر عنه بصيامي
أتوب وارجع في عصياني
واقول بكره هاتوب تاني
ونفس الذنب يتكرر
كأنه طير بيتحرر
وانا جوّة القفص مسجون
مانيش زاهد ولا معصوم
ومن ساسي لحد الراس
أنا كلي كاسيني عيوب
وكان الوعد نتقابل
وانا ماسك ف طرف الليل
قميص مقلوب
وخايف قلبي يحسدني
وانا جوّة الوجع مغلوب
واحلامي رغم قلتها
باعيش فيها وانا مصلوب
بتفسيرها وتأويلها
وفي الآخر بتتحول
لخضة روح خانقها كابوس
وماشي لوحدي في الزحمة
بادندن فيك بكام غنوة
وكام كلمة على كيفك
أرددها مع طيفك
أقول خليك هنا شوية
وباسمع همسهم جنبي
أكيد مجنون
فراقك عني وغيابك
شبيه الموت
وعايش عمري بفراقك
كما المقتول
باردد جملتك دايما
أنا ف حبك باعيش مفتون
حقيقي بجد صدقني
مانيش هاقبل يساوموني
أبيع حبك
ولو عشت الحياة بعدك
أسير مملوك
مفيش غيرك يحررني
أنا في قلبك أنا المملوك
بقلم: وحيد علي الجمال
