ما تبقاش يا قلبي أناني

ما تِبقاش يا قلبي، أناني

بقلم: ناجح شرقاوي

معرفش ليه.. لما غابت قلبي عني غاب
ويعاتبني إني مسألتش عليها؟!
ومعرفش ليه العتاب؟!
يا قلبي، انسى الهوا واقفل علينا ألف باب
نِسِيت يا قلبي، اللي جَرَى مِـ اللي حبيناهم
وادِّيناهم عمرنا؟!
اللي باعنا واللي خانَّا واللي سابنا بدون أسباب!

إوعاك تقوللي عايز احب واعشق وادوب
وارجع أداوي فيك ألف شهر
ارضى يا قلبي، بالمكتوب
مكتوب عليك تعيش وحيد
حتى لو نَدَه عليك ألف قلب.
كلهم كدَّابين
الجرح مُر
ما تبقاش عنيد

لو كنت ناسي.. تعالى نرجع كام سنة
تِلْقَى الليالي كانت سنين
مانكِرش شوفنا يومين هنا
لكن رِجِعنا مجروحين
لا إنت إنت، ولا أنا بقيت أنا

طب قوللي شايف فيها إيه مختلف؟!
طيبة وحنونة، ومالية الكون فرحة وسعادة؟
ممكن تكون هي عادة
فيه ناس كدا تحس إنها طيبة
هي فعلا جميلة وضحتكها قُرَيِّبة
خجولة وجريئة ولمستها حنينة
خطفتني..
أول مرة شوفتها.. حسيت إني أعرفها من زمان
حسيت فى عنيها بأمان
ولمَّا اتقابلنا.. لقيت حتى الشمس بِتْصُبّ فى عنيها العسل
وخدتني نوبة كسل
إني أقوم من جنبها
وكل كلمة قولتها
ضحكت عليها وقتها

كنا صحبة..
بس ما كنتش شايف بِعِيني غِيرها
واتفقنا فى كل كلمة
هي قالتها أو أنا قولتها

عايز أقوللك إيه كمان؟
إني بحبها!
طب إيه هيحصل لو قولتها
أو حتى اعترفت إني بحلم أكون جَنبها
وإن حبي هو كمان يكون ساكن قلبها

حرام عليك بقا النار اللى اطَّفِت
ليه بتقيدها تاني؟
اِبعدنا عن سكة الشَّقا
ما بقيتش عايز أماني

لو صحيح بتحبها.. سِيبها لْحياتها واللي ضايع مِنَّها
ما تِبقاش يا قلبي، أناني
هي لسه سِكِّتها طويلة، واِنت خالي
من ألف ليلة..

اصبر يا قلبي، وَيَّايا؛ يِمكن تكون جميلة نهاية الحكاية
وتعيش يا قلبي، فـْ حُضنها، ويعيش قلبها معايا..