مطلوب أعيش
بقلم: عبير سعد
مطلوب أعيش وسط الوجع
ووسط الأمل
وسط الحكاوي
إللي اتكتب
طول الزمان متتحكيش
مطلوب أعيش
وسط الحروف
إللي بِترسم جوه مني
مية طريق
بكلمة حلوة
تِشعل حَريق
وشوقي نار
جوه قلبي متتطفيش
مطلوب أعيش
وسط الدروب
يتوه قلبي
في كلمة حُب منسِية
ولوعة آه وتنهيدة
ولحن حزين
لغنوة حب
يوم قالها
وكل حروفها
تتبعتر في ريح فرقة
تقول فوقي ومتحلميش
مطلوب أعيش
ومهما البعد نال مني
أجري وأعافر
ما العشق كافر
بتوه وياه
في شمس عيون
بنورها الكون
صبح مجنون
وليله نهار
أعيش في ضياه
أغنيله يا شمس
عيونه متغربيش
عشقته زمان
وكان لي حياة
وسر سعادتي
جوه قلبي مخبياه
يطل في عيوني
دموع تروي حنيني ليك
ومنها مداد
حروف عشقي بتسمعها
وبين ضحكة وتنهيدة
تقولي احكي ومتسكتيش
مطلوب أعيش
والشوق ساعاته متنتهيش
سنين راحت
سنين جايه
وطول العمر
بتمنى أكون جواك
حكاية حلوة متتنسيش
