أنا كل دُول
بقلم: أمل أمين
أنا كل دول
وأكتر شويه
العمر يجري
وتضيع سنينه
من بين إيديا
لكني عادي
عايشة في طفولتي
ومهما أكبر
انسى إن برضه
يبان عليا
ميهمنيش
لو معجبكش
وتنتقد كل إللي فيا
أو تشاور من بعيد
وتنكر للحظة
إني أد المسؤلية
مش لازم أبقى ست جد
أو كل كلمة ليها رد
ويظهر الهم في عينيا
لأ
لسه بمشي
وأعد الخطاوي في سكتي
وبكل قلبي في عز نومي
لازم أحضن لعبتي
ومن الورق بعمل مراكب
وأسيبها عايمة في دمعتي
وفي منامي بنادي فرسي
وألعب معاه
وأركب وأطير
وأنسى مشاكلي ودنيتي
ولما أقوم وأزعل شويه
بجمع زهوري
وأشكي لها همي
في وحدتي
أنا كل دول
ولو لقيتني
ما بين إيديك
وبجري عليك
افتح ذراعك
خلي حضنك
يبقى طريقي ووجهتي
وإياك في لحظة
تخليني أخاف
والحضن يبقى طريقه سد
هبعد وأغيب
وإوعاك تلومني
عيب عليك واللهِ جد
ما أنت عارف
هو ده قلب العيال
لو يرتجف
يبعد ويعند
ولا عمره يكبر
لأي حد
